అఖిల్ రెండవ సినిమా పోస్టర్ లీకైంది !

'అఖిల్' సినిమాతో ఎంట్రీ ఇచ్చిన అఖిల్ అక్కినేని.. ఆ సినిమాతో భారీ ఫ్లాపును చవిచూశాడు. కట్ చేస్తే కోలుకోవడానికి ఏకంగా ఒక ఏడాది పట్టింది. ఇప్పుడు సెన్సిబుల్ గా సినిమాలను తీసే దర్శకుడు విక్రమ్.కె.కుమార్ డైరక్షన్ లో మనోడు తన రెండో సినిమాను చేస్తున్నాడు. ఇంకా టైటిల్ ఖరారు కాని ఈ సినిమా ఫస్ట్ లుక్ పోస్టర్ ఒకటి చెప్పాపెట్టకుండా బయటకు వచ్చేసింది. అది లీకైన పోస్టరట. అయితే లీకైతే ఏముందిలే అంటూ ఇప్పుడు నాగార్జునే స్వయంగా ఒరిజినల్ సైజ్ పోస్టర్ ను ట్వీట్ చేశారు.

నిజానికి ఆగస్టు 21న పేరుతో సహా రావాల్సిన ఈ పోస్టర్ ను ఇప్పుడు సినిమా పేరు లేకుండా రిలీజ్ చేశారు. అయితే ఈ పోస్టర్ లో తన గాళ్ ఫ్రెండ్ (కొత్తమ్మాయ్ కళ్యాణి ప్రియదర్శన్) కోసం అఖిల్ మాఫియా దుండగులను కొడుతున్నట్లు కాస్త డిఫరెంట్ గానే ప్రయత్నం చేశాడు. కాకపోతే పోస్టర్ చూస్తుంటే ఈ మధ్యన రిలీజైన హిందీ 'ఏ జెంటిల్మన్' సినిమా పోస్టర్ థీమ్ కు దగ్గరగా ఉంది. ఒక క్లాస్ లుక్కింగ్ బాయ్.. తన గాళ్ ఫ్రెండ్ కోసం దుండగులతో ఫైటింగ్.. ఆపై పెద్ద పెద్ద చేజులూ.. ఫైట్లు.. బిల్డింగులూ.. హెలికాప్టర్లూ.. ఇప్పుడు విక్రమ్ కె కుమార్ తీస్తున్న సినిమా కూడా ఆ రేంజులోనే ఉన్నట్లుంది.

ఈ రెండో సినిమాతో టాలీవుడ్ లో తన సత్తా గట్టిగా చాటి బాక్సాఫీస్ దగ్గర స్థిరపడాలని చూస్తున్నాడు అఖిల్. ఎందుకంటే బాక్సాఫీస్ దగ్గర పటిష్టంగా ఒక ఫిగర్ రాబడితేనే స్టార్ స్టేటస్ ఇంకా పెరిగేది. చూద్దాం మరి ఆగస్టు 21న ఈ సినిమా గురించి ఏం చెబుతారో. అయితే ఈ సినిమాకు ''రంగుల రాట్నం'' అనే టైటిల్ పెడుతున్నట్లు ఆల్రెడీ రూమర్లు వచ్చిన సంగతి తెలిసిందే.